ان کی نظر میں جب سے میں ہوں رنج نہیں ، آلام نہیں

میری نظر میں اس سے بڑھ کر اور کوئی انعام نہیں

رونے والی آنکھیں مانگو ، رونا سب کا کام نہیں

ذکر محبت عام ہے لیکن سوز محبت عام نہیں

تو شاعر ہے نعت نبی کا ، واعظ بن کر بات نہ کر

خضر سے رستہ پوچھ کے چلنا دیوانوں کا کام نہیں

جو محروم رخت سفر تھے ان کی گلی تک جا پہنچے

جذبہ الفت صادق ہو تو کوئی تڑپ ناکام نہیں

ان کا ثنا خواں ، ان کا بھکاری ، ان کا سوالی ، ان کا گدا

صرف ادیب نہ بولو مجھ کو ، ایک ہی میرا نام نہیں