ازل کی خوشبو ہو جس میں پنہاں ، کوئی بتائے تو نام ایسا

وہ نام احمد کہ پھول برسیں ، بیان ایسا ، کلام ایسا

وہی ہے قرآں ، وہی ہے فرقاں ، وہی ہے ، رب جس کا ہے ثنا خواں

فرشتے پڑھ پڑھ کے جھومتے ہیں ، درود ایسا ، سلام ایسا

ہے دین حق میں جمال یزداں ، ہے عرش بھی جس پہ آج نازاں

وہی تو لایا ہے دین ایسا ، وہی تو لایا نظام ایسا

وہ جس کا سایہ تو عرش پر ہے ، وہ جس کا ذروں کے دل میں گھر ہے

وہی جو چمکا تو پھر نہ ڈوبا ، وہی ہے ماہ تمام ایسا

نظر میں یکساں غلام و آقا ، بزرگ و برتر ہے صرف تقوی

کوئی جہاں میں ہے دین ایسا ؟ کہیں ہے کوئی نظام ایسا ؟

وہ جس اندھیری گلی سے گذرا ، بدل دیا نور میں اندھیرا

دلوں کی دنیا بدل کے رکھ دی ، دیا دلوں کو پیام ایسا

عقیل ایسا ، خلیل ایسا ، جلیل ایسا ، جمیل ایسا

نہ رفعتوں میں ، نہ عظمتوں میں ، کسی نے پایا مقام ایسا

ازل کی خوشبو ہو جس میں پنہاں ، کوئی بتائے تو نام ایسا

وہ نام احمد کہ پھول برسیں ، بیان ایسا ، کلام ایسا